ஸ்ரீநகர்,செப்.19:ராணுவத்தின் அட்டூழியம் அதிகரித்துவரும் கஷ்மீரில் மேலும் 4 பேர் துப்பாக்கிச்சூட்டில் பலியாயினர்.50க்கும் மேற்பட்டோர் படுகாயமடைந்தனர்.போலீஸ் துரத்தியதால் கால்வாயில் குதித்த 10 வயது சிறுவனின் உடல் நேற்று நதிக்கரையிலிருந்து மீட்கப்பட்டதைத் தொடர்ந்து இந்தியாவிற்கு எதிரான போராட்டங்கள் மேலும் வலுவடைந்துள்ளன.
அனந்த் நாக்கில் போலீசுக்கு பயந்து ஓடிய பள்ளி மாணவரான மஃரூஃப் அஹ்மத் நாத் என்ற சிறுவனை கடந்த ஒருவாரமாக காணவில்லை. இந்நிலையில்தான் அவருடைய உடல் நதிக்கரையில் கண்டெடுக்கப்பட்டது. மஃரூஃபின் மரண ஊர்வலத்தில் ஆயிரக்கணக்கானோர் ஊரடங்கு உத்தரவை மீறி பங்கேற்றனர்.
இந்தியாவிற்கு எதிராகவும், சுதந்திரகோஷமும் முழக்கிய போராட்டக்காரர்களை நோக்கி போலீஸ் நடத்திய அநியாய துப்பாக்கிச்சூட்டில் நூருத்தீன் தக்கா என்ற இளைஞர் கொல்லப்பட்டார். ஏராளமானோருக்கு காயம் ஏற்பட்டது. இரண்டு பேரின் நிலை கவலைக்கிடமாக உள்ளது.
பாராமுல்லா மாவட்டத்தில் பத்தான் பகுதியில் மஸ்ஜிதிலிருந்து தொழுகை முடித்துவிட்டு வெளியேவந்தவர்கள் மீது பாதுகாப்புப் படையினர் நடத்திய அக்கிரம துப்பாக்கிச்சூட்டில் இரண்டுபேர் கொல்லப்பட்டனர்.
எவ்வித போராட்டமும் நடக்காமலேயே பாதுகாப்புப் படையினர் துப்பாக்கியால் சுட்டதாக ஊர்வாசிகள் கூறுகின்றனர். அன்சாருல்லாஹ் தந்த்ரே, அலி அஹ்மத் வாஸா ஆகியோர்தான் கொல்லப்பட்டவர்கள்.
இதற்கிடையே ஸ்ரீநகரில் பெமினாவில் நேற்று முன்தினம் துப்பாக்கிச்சூட்டில் காயமடைந்த ஃபயாஸ் அஹ்மத் நாய்கோ நேற்று சிகிட்சை பலனின்றி மரணமடைந்தார். இத்துடன் கடந்த மூன்று மாதங்களில் பாதுகாப்புப் படையினரின் அநியாயமான துப்பாக்கிச்சூட்டில் கொல்லப்பட்டவர்களின் எண்ணிக்கை 100 ஆக உயர்ந்துள்ளது.
ஸ்ரீநகரின் சில பகுதிகளில் ஏழுமணிநேரம் ஊரடங்கு உத்தரவை விலக்கியது மக்களுக்கு சற்று ஆசுவாசத்தை ஏற்படுத்தியது.
செய்தி:தேஜஸ் மலையாள நாளிதழ்
0 கருத்துகள்: on "கஷ்மீர்:மேலும் 4 பேர் மரணம்"
கருத்துரையிடுக