டோனி பிளேயர் மனைவியின் உறவினர் இஸ்லாத்தை தழுவினார்

லண்டன்,அக்,26:முன்னாள் பிரிட்டீஷ் பிரதமர் டோனி பிளேயரின் மனைவி செரி பிளேயரின் ஒன்றுவிட்ட சகோதரியும், மனித உரிமை மற்றும் பத்திரிகை பணியாளருமான லாரன் பூத் இஸ்லாத்தை தழுவியுள்ளார்.

ஈரானின் சர்வதேச செய்தி நிறுவனமான ப்ரஸ் டி.வியில் பணியாற்றும் லாரன் பூத் கடந்த செப்டம்பர் மாதம் ஈரானுக்குச் சென்ற பிறகு தமது கத்தோலிக்க கிறிஸ்தவ நம்பிக்கையை துறப்பதற்கு முடிவு செய்தார்.

சர்வதேச அமைதி மற்றும் ஒற்றுமை (Global Peace and Unity) என்ற அமைப்பின் சார்பாக நடைப்பெற்ற பேரணியில் பங்கேற்ற லாரன் பூத் தனது தலையை மறைத்தவாறு (ஹிஜாப் அணிந்தவாறு) கலந்துக் கொண்டது அவர் இஸ்லாத்தை தனது வாழ்க்கை நெறியாக அங்கீகரித்ததை செய்தியாக்கியது.

தான் இஸ்லாத்தை தழுவியதுக் குறித்து லாரன் பூத் கூறுகையில்: "நான் தற்பொழுது 5 நேரமும் தொழுகையை பேணி வருகிறேன். அடிக்கடி மஸ்ஜிதுக்கும் செல்வதுண்டு. புனித திருக்குர்ஆனை தினமும் ஓதி வருகிறேன். கடந்த 25 ஆண்டுகளாக ஒன்றோ அல்லது இரண்டோ க்ளாஸ் வைன்(மது) அருந்தாமல் எனக்கு இரவில் தூக்கம் வராது. ஆனால், கடந்த 45 தினங்களாக மதுவையோ பன்றி இறைச்சியையோ தொட்டதில்லை. முஸ்லிமாக மாற நான் தீர்மானித்ததோடு எனக்கு மதுவின் மீதிருந்த பிரியம் இல்லாமல் போனது.

அன்பு மிக்கவர்களும், அமைதியை விரும்புவர்களுமான முஸ்லிம் உம்மத்தில் (சமுதாயத்தில்) ஒரு அங்கமாக என்னை இணைத்ததில் நான் பெருமைக் கொள்கிறேன்." இவ்வாறு லாரன் பூத் கூறியுள்ளார்.

43 வயதான லாரன் பூத், டோனி பிளேயரின் மேற்காசியக் கொள்கைகளை கடுமையாக எதிர்த்தவர் ஆவார். ஃபலஸ்தீன் பிரச்சனையில் டோனி பிளேயருக்கு மத்தியஸ்தம் வகிப்பதற்கான தகுதி இல்லை என சமீபத்தில் லாரன் பூத் விமர்சித்திருந்தார்.

செய்தி:தேஜஸ் மலையாள நாளிதழ்